Elsehood

All pieces

माइन्युट पुस्तिकापाना ३६

शरीर प्राइभेट लिमिटेड

(कम्पनी ऐन, २०६३ अन्तर्गत दर्ता भएको)

रजिस्टर्ड कार्यालय: ओछ्यान, दायाँ कोल्टो

कम्पनी दर्ता नं.: जन्मदर्ता  |  स्थापना: जन्मदिन

प.सं.: ०८३/८४च.नं.: ३६
मिति: जन्मदिनको भोलिपल्ट

सञ्चालक समितिको छत्तीसौँ (वार्षिक) बैठकको निर्णय

आज मिति जन्मदिनको भोलिपल्ट, बिहान ३:१० बजे (अध्यक्षज्यूलाई निद्रा नलागेकाले), कम्पनीको रजिस्टर्ड कार्यालय ओछ्यान, दायाँ कोल्टोमा सञ्चालक समितिका अध्यक्ष श्री मस्तिष्कज्यूको अध्यक्षतामा सञ्चालक समितिको बैठक बस्यो। गणपूरक संख्या पुगेको यस बैठकले निम्न प्रस्तावहरूमा छलफल गरी निर्णयहरू गर्‍यो।

उपस्थिति

क्र.सं.नामपददस्तखत
१ मस्तिष्क अध्यक्ष Mastishka
२ मुटु सञ्चालक Mutu
३ कलेजो सञ्चालक भर्चुअल
४ पेट सञ्चालक Pet
५ फोक्सो सञ्चालक Phokso
६ आँखा स्वतन्त्र सञ्चालक Ankha
७ खुट्टा कर्मचारी प्रतिनिधि Khutta
८ मृगौला कम्पनी सचिव Mrigaula
विशेष आमन्त्रित
एमिग्डाला (गुफाबासी, उमेर अज्ञात)
बाह्य लेखापरीक्षक
इन्ट्रोपी एण्ड एसोसिएट्स
अनुपस्थित
दाँत नं. ३६ (पोहोर साल राजीनामा दिइसकेको)

प्रस्ताव नं. १: अघिल्लो बैठकका निर्णयको कार्यान्वयन

सचिवले अघिल्लो वर्षका निर्णयहरूको स्थिति प्रस्तुत गर्नुभयो।

  1. "हरेक बिहान ५ बजे उठ्ने" निर्णय सात दिन कार्यान्वयन भएको।
  2. "जिम सदस्यता" को शुल्क बाह्र महिनाको तिरिएको, सेवा दुई पटक उपभोग गरिएको। सचिवले यो रकमलाई "दान" शीर्षकमा सार्न सुझाव दिनुभयो।
  3. "चिनी कम गर्ने" निर्णयअनुसार चियामा चिनी घटाइएको, तर सोही अवधिमा मिठाई खर्च बढेकाले कुल चिनी अपरिवर्तित रहेको।
निर्णय नं. १: उल्लिखित सबै निर्णय यस वर्षका लागि पनि यथावत् कायम राख्ने। पेटले यसमा फरक मत राख्नुभयो।

प्रस्ताव नं. २: वार्षिक लेखापरीक्षण प्रतिवेदन

लेखापरीक्षक इन्ट्रोपीले प्रतिवेदन प्रस्तुत गर्दै भन्नुभयो, "कम्पनी चलिरहेको छ। चल्ने गति चाहिँ घटिरहेको छ।"

प्रतिवेदनका मुख्य कैफियत:

  1. कपाल खातामा उल्लेख्य कमी देखिएको, कुनै कागजात नभएको।
  2. आँखाले चश्माका लागि पुँजीगत खर्च माग गरेको।
  3. घुँडाले सिँढी चढ्दा आवाज निकाल्न थालेको, जसलाई लेखापरीक्षकले "सामान्य टुटफुट" भनी उल्लेख गर्नुभयो।

अध्यक्षले लेखापरीक्षकको सेवा शुल्कबारे सोध्नुभयो। लेखापरीक्षकले जवाफ दिनुभयो, "मेरो सेवा कुनै सम्झौताबिना निरन्तर रहन्छ। शुल्क अन्त्यमा एकमुष्ट लिइन्छ।"

निर्णय नं. २: प्रतिवेदन स्वीकृत। बैठकमा कसैले लेखापरीक्षक फेर्ने प्रस्ताव राखेन, किनकि बजारमा अर्को लेखापरीक्षक उपलब्ध छैन।

प्रस्ताव नं. ३: पेटको विस्तार योजना

पेटले थप ठाउँ माग गर्नुभयो। सचिवले जानकारी गराउनुभयो कि पेटले गत वर्ष नै समितिको स्वीकृतिबिना बाह्र प्रतिशत विस्तार गरिसक्नुभएको छ। यसबारे बेल्टले लिखित उजुरी दिएको छ, र बेल्ट अहिले अन्तिम प्वालमा पुगेको छ।

पेटले भन्नुभयो, "विस्तार होइन, यो त भविष्यका लागि लगानी हो।"

निर्णय नं. ३: पूर्वस्वीकृतिको माग अस्वीकृत। पेटलाई आउँदो वर्ष आकार घटाउन निर्देशन। पेटले बैठकमा राखिएको चिया-बिस्कुटप्रति आपत्ति जनाउँदै फरक मत राख्नुभयो।

प्रस्ताव नं. ४: अध्यक्षज्यूको नयाँ परियोजना

अध्यक्षले रातको ३:२५ बजे एउटा नयाँ परियोजनाको प्रस्ताव राख्नुभयो: जागिर छोडेर एउटा किताब लेख्ने, एउटा एप बनाउने, र दाङमा बाख्रा पाल्ने। तीनवटै एकै साथ।

एमिग्डालाले तत्काल आपत्ति जनाउनुभयो: "समाजले के भन्ला? भोकै मरिन्छ। गुफाबाट बाहिर निस्कनु हुँदैन।" उहाँको आपत्तिसँगै मुटुको धड्कन प्रति मिनेट एक सय दस पुग्यो र हत्केलामा पसिना आयो।

स्वतन्त्र सञ्चालक आँखाले भन्नुभयो, "यही प्रस्ताव हामीले पोहोर पनि रातको तीन बजे देखेका थियौँ। उज्यालो भएपछि हराएको थियो।"

फोक्सोले लामो सास फेर्नुभयो। माइन्युटमा यसलाई तटस्थ मत मानियो।

निर्णय नं. ४:
  1. रातको ३ बजेदेखि ५ बजेसम्म पारित भएका प्रस्तावहरू बिहान ९ बजे फेरि पुष्टि गर्नुपर्ने नीति पारित।
  2. एमिग्डालालाई धन्यवाद दिँदै, उहाँको जिम्मेवारी "मूल गेट" सम्म मात्र सीमित गर्ने। घरभित्रका निर्णयमा उहाँको मत परामर्शका रूपमा मात्र लिइने।
  3. एमिग्डालाले यस निर्णयको विरोधमा अलार्म बजाउनुभयो। अलार्म बीस मिनेटपछि आफैं बन्द भयो।

प्रस्ताव नं. ५: कलेजोको राजीनामा पत्र

सचिवले कलेजोको राजीनामा पत्र पढेर सुनाउनुभयो:

"बीस वर्षदेखि तपाईंहरूका सबै उत्सव, सबै बिदाइ, सबै 'एक पेग मात्र' मैले एक्लै धानेँ। तपाईंहरू नाच्नुभयो, म रातभर काम गरेँ। बिहान टाउको दुखेको गुनासो अध्यक्षज्यूले गर्नुभयो, श्रेय मैले कहिल्यै पाइनँ। म थाकेँ।"

अध्यक्षले कलेजोको सेवाको उच्च मूल्याङ्कन गर्नुभयो। सचिवले जानकारी गराउनुभयो कि कम्पनीको विधानअनुसार कलेजोले राजीनामा दिन मिल्दैन, र बजारमा पाइने विकल्प अत्यन्त महँगो छ र अरू कसैको हो।

निर्णय नं. ५: राजीनामा अस्वीकृत। कलेजोको शुक्रबार साँझको कार्यभार घटाउने। कलेजोले भन्नुभयो, "यही आश्वासन मैले पोहोर पनि पाएको थिएँ।" माइन्युटमा उहाँको भनाइ उल्लेख गरियो।

प्रस्ताव नं. ६: विविध

  1. कर्मचारी प्रतिनिधि खुट्टाले भन्नुभयो, "हामीलाई पनि कहिलेकाहीँ प्रयोग गर्नुहोला। हामी कुर्सीमा बसेरै थाकिसक्यौँ।" समितिले यसलाई गम्भीरतापूर्वक लिने निर्णय गर्‍यो। खुट्टाले प्रतिक्रिया दिनुभएन। उहाँ सुतिसक्नुभएको थियो।
  2. बैठकभरि नबोल्नुभएका सञ्चालक मुटुले अन्त्यमा बोल्ने अनुमति माग्नुभयो।
"म यो कम्पनीमा एक मात्र सञ्चालक हुँ, जसले छत्तीस वर्षमा एक सेकेन्ड पनि बिदा लिएको छैन। मलाई नाफा चाहिँदैन। विस्तार पनि चाहिँदैन। मलाई एउटा कुरा मात्र थाहा पाउनु छ: हामी यो सबै केका लागि चलिरहेका छौँ?"

बैठकमा केही समय मौनता छायो। फोक्सोले सास रोक्नुभयो। एमिग्डालाले पनि अलार्म बजाउनुभएन।

निर्णय नं. ६: प्रश्न अनुत्तरित। आगामी बैठकमा छलफल गर्ने।

अध्यक्षलाई निद्रा लागेकाले बैठक बिहान ४:४५ बजे स्थगित भयो।

Mrigaula मृगौला कम्पनी सचिव
Mastishka मस्तिष्क अध्यक्ष

सचिवको टिप्पणी: मुटुको उक्त प्रश्न विगत पैँतीस बैठकदेखि "आगामी बैठक" मा सार्दै आइएको छ।

यो माइन्युट सञ्चालक समितिको आगामी बैठकबाट अनुमोदन हुन बाँकी छ।

Stumbler, November 2026